जिल्हा प्रतिनिधी:अहमद अन्सारी परभणी
नाशिक येथील नाशिक सायकलिस्ट फाउंडेशनच्या वतीने ब्रह्मगिरी ते राजमहेंद्री अशी गोदावरी परिक्रमा सायकल दिंडी चालू आहे.
सदरची दिंडी गोदावरीचे उगमस्थान ब्रह्मगिरी येथून प्रस्थान होऊन राजमहेंद्री आंध्र प्रदेश या ठिकाणी जेथे गोदावरी बंगालच्या उपसागरास मिळते तेथे जाऊन तेथून परत ब्रह्मगिरी पर्वताकडे जाणार आहे. या दिंडीचे दिंडी प्रमुख श्री चंद्रकांत नाईक सर, उपाध्यक्ष नाशिक सायकलिस्ट फाउंडेशन यांनी मनोगत व्यक्त करताना सांगितले की, पर्यावरणाचा सामाजिक संदेश देण्याच्या उद्देशाने त्यांनी ही परिक्रमा दिंडी काढली असून पर्यावरणाचे संवर्धन करण्यासाठी त्यांनी मोटरसायकल अथवा कार, मोटार गाडीने ही परिक्रमा न करता पर्यावरणाचे प्रदूषण होऊ नये म्हणून सायकलने गोदावरी परिक्रमा करण्यासाठी ही सायकल दिंडी काढली आहे. सदर दिंडीतील भक्त हे 60 ते 70 वर्षांचे ज्येष्ठ नागरिक आहेत.
ही दिंडी सोमवार दिनांक 29 नोव्हेंबर 2021 रोजी परमपूज्य श्रीसाईबाबा जन्मस्थान मंदिर, पाथरी येथे दुपारी बारा वाजता माध्यान्ह आरतीचे वेळी पोहोचल्यावर सौ छाया कुलकर्णी मंदिर अधीक्षक यांनी श्रीसाई स्मारक समितीच्या व्यवस्थापन मंडळाच्यावतीने त्यांचा यथोचित सत्कार केला. प्रसंगी भालचंद्र दिवान उर्फ बंडू मामा, ना. के. कुलकर्णी मुख्य कार्यकारी अधिकारी, प्रभाकर पाटील, बालाजी बेदरे, योगेश गुरु ईनामदार वाळुजकर शास्त्री पुजारी, अजय गुरु शास्त्री पाथरीकर पुजारी, विष्णुपंत शिंदे, प्रकाश शिंदे, कमलबाई तेलंगे, सुजाता डहाळे, शिवकन्या नागठाणे, इत्यादींची उपस्थिती होती. अशी माहिती श्रीसाई स्मारक समितीचे प्रताप आम्ले यांनी दिली.
