उपसंपादक:विशाल इन्दोरकर
मराठी भाषा, साहित्य आणि संस्कृतीच्या संवर्धनासाठी कार्यरत असलेल्या सृजन मराठी साहित्य परिषद, महाराष्ट्र राज्य या राज्यव्यापी साहित्यिक चळवळीने महाराष्ट्रातील विविध विभागांसाठी विभागीय समन्वयकांची नियुक्ती जाहीर केली आहे. साहित्यिक उपक्रमांची प्रभावी अंमलबजावणी, नवोदित लेखकांना मंच उपलब्ध करून देणे आणि राज्यभरातील साहित्यप्रेमींना एकत्रित जोडणे हा या नियुक्त्यांचा मुख्य उद्देश आहे.परिषदेच्या राज्यस्तरीय समन्वय फोरमच्या सभेत नागपूर विभागीय समन्वयकपदी चंद्रपूर जिल्ह्यातील प्रसिद्ध साहित्यिक ऍड.भूपेश पाटील यांची निवड करण्यात आली आहे.ऍड.भूपेश पाटील
यांचेकडे नागपूर, वर्धा, भंडारा, गोंदिया, चंद्रपूर व गडचिरोली या जिल्ह्यांची जबाबदारी देण्यात आली आहे.
सृजन मराठी साहित्य परिषद राज्यभर साहित्य, संस्कृती आणि सृजनशीलतेची व्यापक चळवळ उभी करण्यासाठी सातत्याने कार्यरत आहे. नव्या समन्वयकांच्या नेतृत्वाखाली विविध साहित्यिक उपक्रम, कवी संमेलने, कथाकथन, चर्चासत्रे, वाचन चळवळ आणि सामाजिक-सांस्कृतिक कार्यक्रम अधिक व्यापक स्वरूपात राबविण्यात येणार आहेत.
राज्यातील सर्व साहित्यिक, कवी, लेखक, पत्रकार, वाचक आणि मराठी भाषाप्रेमींनी या साहित्यिक चळवळीत सक्रिय सहभाग नोंदवावा,असे आवाहन नागपूर विभागीय समन्वयक ऍड. भूपेश पाटील यांनी केले आहे.
