कोअर झोनमधील कोलारा गेट जवळील घटना
तालुका प्रतिनिधी:मंगेश शेंडे चिमुर
ताडोबा व्याघ्र अभयारण्य मध्ये सुरू झालेल्या वन्य प्राणी गणनेसाठी कर्तव्यावर असलेल्या एका महिला वनरक्षकावर वाघीनीने प्राणघातक हल्ला करून ठार केल्याची घटना आज शनिवारी (20 नोव्हेंबर 2021) ला सकाळी आठ वाजता च्या सुमारास कोलारा गेट जवळ घडली आहे. सौ. स्वाती नानाजी ढूमणे वय 31 वर्षे असे असे या महिला वनरक्षकाचे नाव आहे. या घटनेने ताडोबा व्याघ्र अभयारण्यात एकच खळबळ उडाली आहे.
व्याघ्र पर्यटनासाठी जगप्रसिद्ध असलेल्या ताडोबा व्याघ्र अभयारण्य मध्ये 19 नोव्हेंबर ते 26 नोव्हेंबर 2021 या कालावधीत वन्यप्राणी गणना होत आहे. प्राण्यांची गणना करण्याकरिता ट्रांझेस्ट लाईन चे काम ताडोबा अभयारण्यातील पाणवठ्यावर सुरू आहे. कोलारा गेट जवळील कोअर झोनमध्ये पाणवठा क्रमांक 97 जवळ ट्रांझेस्ट लाईन चे काम सुरू होते, त्यामुळे आज शनिवारी (20 नोव्हेंबर 2021) ला सकाळी आठ वाजता वनरक्षक स्वाती नानाजी ढूमणे या चौकीदारासह कर्तव्यावर गेल्या होत्या.कोलारा गेट जवळ कोअर झोनमध्ये पाणवठा कक्ष क्रमांक 97 मध्ये काम करीत असताना अचानक समोर वाघीण पुढे आली. तिचा रस्ता चुकवून बाजूने जाण्याचा प्रयत्न करताच वाघिणीने महिला वनरक्षकावर हल्ला चढविला. आणि तिला जंगलात ओढत नेवून ठार केले. त्यानंतर ती वाघिण पळुन गेली. नेहमी पर्यटकांना भूरळ घालणा-या ह्या वाघिणीने आज अचानक रौद्र रूप धारण करून वनरक्षकालाच ठार केल्यानेची माहिती ताडोबात पसरताच एकच खळबळ उडाली.पाच दिवसाच्या अगोदर दोन वनकर्माचारी व शेतकरी यांचे वर सुध्दा प्राण घातक हल्ला झाला होता अशी चर्चा गावकऱ्यांमध्ये सुरू आहे .
सदर घटनेची माहिती ताडोबा व्यवस्थापनाच्या वरिष्ठ अधिकाऱ्यांना होताच त्यांनी घटनास्थळी येऊन पहाणी केली .मृतदेह ताब्यात घेतला व पंचनामा करून उप जिल्हा रुग्णालय चिमूर येथे शव विच्छेदन करण्या साठी पाठवण्यात आले.
त्यांनंतर वनपरिक्षेत्र अधिकारी प्रादेशिक कार्यालय परिक्षेत्र चिमूर येथे श्रद्धांजली वाहण्यात आली.चिमूर येथील स्मशान भूमी येथे अंतिम संस्कार करण्यात आला मृतक वनरक्षकाच्या पश्चात पती, एक मुलगी आहे. ती जिवती तालुक्यातील रहिवासी असल्याचे समजते.या घटनेने ताडोबातील वन कर्मचाऱ्यांमध्ये प्रचंड दहशतीचे वातावरण निर्माण झाले आहे.
