तालुका प्रतिनिधी: प्रा. विश्वनाथ मस्के नागभिड
कोविडनंतर शिक्षण क्षेत्रात मोठ्या प्रमाणावर तंत्रज्ञानाचा वापर वाढला असला, तरी आजची शिक्षण व्यवस्था ऑनलाईन कामाच्या वाढत्या ओझ्याखाली दबली जात असल्याचे चित्र दिसत आहे. शाळा, महाविद्यालये आणि शिक्षक-विद्यार्थी सर्वांवरच ऑनलाईन शिक्षणाशी संबंधित कामांचा अतिरिक्त ताण वाढला आहे.
विद्यार्थ्यांना ऑनलाईन वर्ग, गृहपाठ, प्रकल्प, चाचण्या, असाइनमेंट्स आणि विविध शैक्षणिक अॅप्सवरील कामे सतत करावी लागत आहेत. यामुळे विद्यार्थ्यांच्या स्क्रीन टाइममध्ये मोठी वाढ झाली असून डोळ्यांचे विकार, डोकेदुखी, झोपेचा अभाव व मानसिक ताण अशा समस्या वाढत आहेत.
दुसरीकडे शिक्षकांनाही ऑनलाईन अध्यापनासोबत उपस्थिती नोंद, अहवाल तयार करणे, विविध पोर्टल्सवर माहिती भरणे, विद्यार्थ्यांचे मूल्यांकन व पालकांशी ऑनलाईन संवाद यांसारखी अनेक कामे करावी लागत आहेत. परिणामी शिक्षकांवर प्रशासकीय कामांचा ताण वाढून अध्यापनाच्या गुणवत्तेवर परिणाम होत असल्याची तक्रार व्यक्त केली जात आहे.
ग्रामीण भागात इंटरनेटची अपुरी सुविधा, मोबाईल किंवा संगणकांची कमतरता यामुळे अनेक विद्यार्थ्यांना ऑनलाईन शिक्षणाचा पुरेसा लाभ मिळत नाही. त्यामुळे शिक्षणातील दरी अधिक वाढण्याची भीती शिक्षणतज्ज्ञांकडून व्यक्त होत आहे.
ऑनलाईन शिक्षण हे सहाय्यक माध्यम म्हणून उपयुक्त असले तरी त्याचा अतिरेक टाळणे गरजेचे आहे. ऑफलाईन व ऑनलाईन शिक्षण यांचा समतोल साधून अभ्यासक्रमाचे नियोजन केल्यास विद्यार्थ्यांचे आरोग्य, शिक्षकांचा ताण आणि शिक्षणाची गुणवत्ता टिकवता येईल, असे मत जाणकार व्यक्त करत आहेत.
